من المواضيع الشائكة اللي بيكون في حرج شديد وصعوبة في مناقشتها هي مشاكل العلاقة الحميمية الزوجية.
احنا دورنا هنا نحل مشاكلكم ونقدم لكم الحلول، وهحاول أن أعرض المواضيع بشكل مبسط جداً علمي جداً، بعيد كل البعد عن مناطق الحرج في العرض، فأي حد يقدر يقرأ بدون خدش للحياء.
طبعاً المشاكل دي مش هتتناقش وتتحل في مقال واحد، لكن هتكون في مقالات متعددة هناقشها بشكل مبسط، ونبدأ نتكلم فى كل مرة عن نقطة معينة.
خلل العلاقة الحميمية بين الزوجين
النقطة اللي هنتكلم فيها هي لما يكون عندنا نوع من الخلل في العلاقة بين الزوجين..
- يجب الأول أن نستبعد تماماً وجود سبب مرضي عند أي منهما.
لازم الفحص للزوجة والزوج، وبعد استبعاد الأسباب المرضية التقليدية، نبدأ هنا نبحث في الأسباب الأخرى.
اضطراب الهرمونات
هنتكلم النهاردة عن السبب الأول اللي يخلي العلاقة الحميمية الزوجية مضطربة وهو اضطراب الهرمونات.
زي ما قلنا قبل كده، لما بتضطرب الهرمونات تقريباً كل الحياة بتتلخبط.
من الهرمونات المؤثرة على الدافع الجنسي، واللي أي خلل فيها قد يؤثر على العلاقة الحميمية بين الزوجين، هى هرمون التستوستيرون، الإستروجين، البروجستيرون، الأوكسيتوسين، والثيروكسين.
فى الأساس الفرق بين المرأة والرجل هى فقط نسبة وجود الهرمونات.
بمعنى أن الهرمونات الموجودة في جسد الذكر جميعها موجودة في جسد الأنثى والعكس صحيح تماماً. الفرق هو في نسب هذه الهرمونات، فالأنثى لو انعكست نسب بعض هرموناتها بقيت ذكر.
بالتالي بشكل مبسط، لو حصل خلل في هرمون عند أياً منهما عند المرأة أو الرجل، شئ طبيعي ومتوقع انه هيحصل خلل في الوظيفة المنوطة لهذا الهرمون بعملها. واللى فى الحالة دي هى وجود الرغبة الجنسية أو القدرة على الأداء فى العلاقة.
أول حاجة ربنا خلقها في النفس البشرية هو إنجذاب كل جنس إلى الاخر، فلو حدث نفور من أي طرف من الزوجين، سواء كان من طرف المرأة أو من طرف الرجل يبقى أكيد هنا في مشكلة.
قد تكون عضوية زي اضطراب الهرمونات.
وقد تكون نفسية وتحتاج إلى جلسات علاج نفسي. ودي غاية في الأهمية وعلاجها يعتبر مضمون وبتكون نتيجته مبهرة، ودي هنتكلم عنها أكتر فى المقال الجاي من السلسلة.
ده بشكل مبسط أول موضوع وأول نقطة تخص الخلل في العلاقة الزوجية.
وللموضوع تكمله إن شاء الله.
لو محتاجة المساعدة الطبية أو استشارة إرشاد أسري تقدري تشرفينا في العيادة.
أي سيدة بتيجي من الصفحة، الجروب، أو من الموقع هنا بيكون لها خصم خاص في العيادة.
د. سحر عبد العال حامد
استشارية أمراض النساء والتوليد وعلاج العقم
استشارية إرشاد أسري
