الأسباب العشرة الذهبية لحياة صحية ونفسية سليمة

هدفنا هو ان نكون بأفضل صحة وأحسن حال. صحيح أن لا أحد يعيش أكثر من عمره، لكن ليه العمر ده ميكنش بصحة وسعادة وطاقة وحيوية وشباب، مهما كان الرقم اللي وصلنا له بالارقام؟

في كده قواعد عامة وهنحاول دائما نكون واقعيين جنبا الي جنب مع كوننا مختصين في الطب.

أمثلة للحفاظ علي صحة ممتازة وحياة سليمة

١- النوم

ليلا من ٦ الي ٨ ساعات
وأقل عدد ساعات مسموح بها ٤ ساعات ليلا ونستكمل الظهر ساعتين مثلا

٢- شرب الماء

واقعاً الحياة وسرها كامن في الماء بشكل أساسي . المفروض نشرب ماء ٣ لتر يوميا واقل حد مسموح به ٢ لتر
إشرب سوائل زى ما انت عايز بس متدخلهمش في حساب لترات المياه

٣- المشي

الصح نمشي نص ساعة صباحا، بدايه الشروق. ونص ساعه ليلا، قبل النوم بساعه مثلا
لكن علي الاقل الحد الادنى إمشي ١٠ دقايق مرتين في اليوم

٤- الأكل الصحي

لازم اكلك يكون فيه خضار طازج وفاكهه اي نوع وشربة قبل الغداء
وقلل بقدر المستطاع من اللحوم المصنعة. خليك في الطبيعي بدون اضافات ومواد حافظه
ترتيب الأكل الصحيح الفاكهه ثم السلاطة ثم الشوربة ثم الأكل الأساسي

٥- الانفعالات والعصبية

محدش قال مش هننفعل ولا هنتضايق لأن ده مستحيل، ولكن نقدر ننتبه شوية لنفسنا

يعني بلاش علي الصغيره والكبيره والحاجة اللي تستحق واللي متستحقش. أفضل أهري وأعيد وأزيد لحد ما الضغط والسكر يتلخبطوا.. مع ان الحل سهل وفي ايدينا.

قليلا من الهدوء.

٦- الحب

ايوا زي ما قراتها كدة، الحب. فالحب هو أهم وأكثر وسيلة فعالة للسلام النفسي والصحة النفسية، وبالتالي الصحه الجسدية.

هتقولي طيب انا معنديش حد في حياتي أعمل إيه؟

هقولك حب نفسك الاول بمعني اهتم بنفسك بمظهرك. شوف بتحب ايه واعمله.

غني او ارقص او اجري الصبح او العب لعبة او إتعلم مهارة، ولو من النت.

المهم انك تحب وتعبر عن حبك بصراحة وبقوة، لأن أهم حاجة في الحب هي حالة الشغف واللهفة، فممكن جدا تعيشها مع
صديق او صديقة مقربة جدا
او رياضه بتمارسها
او مشروع متحمس بنجاحه
المهم إوعي تسيب نفسك لقمة سهلة للروتين والرتابة والملل.

٧- الجنون

نعم نعم نعم انتي يا دكتورة بتنصحينا اننا نتجنن؟!
ايوا انت فهمت صح، انا بنصحكم بالجنون، بس جنون مقنن.

يعني عيش جنونك لا في اي وقت ولا اي مكان.
عيشوا مع أليفك الي هو ممكن يكون زوج او زوجة، ممكن صديق مقرب، ممكن اخت او اخ، ممكن حتي كلبك او قطتك.

شوف بتعرف تعمل ايه مجنون بدون حسابات قدام مين يبقي هو ده الشخص المقصود.

مينفعش تفضل عاقل علي طول، ده شيء ممل بجد. صدقني كلنا نحتاج لقليل من الجنون لبعض الوقت لنتحمل صعوبات الحياه الجامدة.

٨- الحوار مع النفس

متخدش أي حاجة ولا أي موقف بعلاته، لازم تاخد وتدي مع نفسك في كل صغيرة وكبيرة الأول علشان دائما تكون راضي عن أفعالك وتصرفاتك واختياراتك

٩- الثقة في النفس

متأزمهاش قوي، وعادي جدا تفشل دي مش نهاية الدنيا يعني.

يا سيدي دي الدول اللي عندها مستشارين ومختصين بالأعداد وبياخدوا قرارات خطيره، زى الحروب مثلا، وبعد كده ممكن يكتشفوا انهم كانوا غلط

فأنت مع نفسك مش عايز تغلط؟ لا معلش

حاول وجرب وافشل وعيد المحاولة ومتزهقش. وصدقني هتنجح وقتها.

المهم اوعي تفقد ثقتك في نفسك.

١٠- وقفة مع النفس لإعادة ترتيب أوراق حياتك

دي اهم حاجة.

انت مش قطار علشان تمشي علي قضبان.
ولا انت شجرة علشان تثبت مكانك وتفضل علي ما انت عليه.

انت انسان عندك حواس لازم تستعملها وتستفاد بها.

من فتره للتانيه كده اوقف مع نفسك وشوف انت انجزت ايه من احلامك وعايز تعمل ايه؟

لازم تكون خطة وتحاول تحققها.

اوعي تعيش انسان عشوائي والا هتضيع كتير من عمرك.

للحوار بقية..