تأجيل الحمل الأول
كتير من السيدات بيلجأوا لتأجيل الحمل الأول بعد الزواج.
مبدئيا أنا مش مع فكره تأجيل الحمل الأول، لكن ممكن نأجل الحمل التاني عادي.
ليه؟
لأن محدش بيكون متأكد مطلقاً سواء سيدة أو رجل إنه قادر على الانجاب.
أو إنه قادر على انجاب طفل سليم، حتي الناس اللي سبق لهم الانجاب.
بالتالي أنصح أي زوجين انهم يجيبوا طفلهم الاول وميخافوش من كده. بالعكس ده هيقربهم اكتر ويقوي العلاقة بينهم.
وسائل منع الحمل
أما الناس المضطرة فعلاً لتأجيل الحمل، سواء لظروف مرضية أو ظروف خاصة بهم لكنها قهرية.
انصحهم بعدم استعمال أدوية لمنع الحمل.
يعني لا حقن ولا أقراص، وطبعاً اللولب ممنوع نهائيًا!
إيه أفضل وسيلة لمنع الحمل؟
- العازل الطبي للزوج مع الأقراص الفوارة للزوجة.
الوسيلتين دول مع بعض توصل درجة المنع لكفاءة الوسائل الأخرى.
- وكمان نحسب وقت التبويض
نحاول نبعد عن علاقه حميمية في الوقت ده، او نستعمل وقتها الوسائل الموضعية اللي ذكرناها لكن بحرص شديد.
أما القذف الخارجي فقط فهي وسيلة غير مضمونه بشكل كامل.
أخطار وسائل منع الحمل
اللولب
لا أنصح بتركيب لولب لأنه تصرف خاطئ تماماً لسيدة لم تنجب من قبل، لأنه هيسبب لها الام شديدة.
كمان هيعرضها لالتهابات قد تتسبب في تأخير حملها أو تعطيه بشكل لا ترغب فيه ابدا.
الحقن والأقراص
أما الحقن والأقراص فهى في الاخر هرمونات، لو هذه السيدة عندها ضعف شديد في التبويض كده الأمور هتتلخبط عندها اكتر، وتقع في مشكلة ربما تستمر لسنوات عدة.
امتى ممكن تستعملي أي وسيلة؟
الحاله الوحيده اللي تستعملي فيها أي وسيله ومش مهم أي حاجه تانية، لو كان حدوث الحمل فيه خطورة عليكي انتي شخصيا ويهدد حياتك.
ووقتها طبعا هتختاري الوسيلة الأنسب لحالتك وظروفك الصحية مع طبيبك المختص.
الخلاصة
لو مفيش خطورة على حياتك من الحمل و فقط عايزة تأجلي الحمل الأول لكي، يبقي إما بالوسائل الموضعية أو بالابتعاد عن العلاقة الحميمية خلال فترة التبويض.
