اتكلمنا قبل كدة عن الولادة القيصرية ووضحنا إن لو هناك اختيار فدايماً بنختار الولادة الطبيعية للمرأة الحامل، لوجود بعض الأضرار للولادة القيصرية.
لكن ده لا يمنع ان فى بعض الاحيان الولادة القيصرية بتكون لها ضرورة طبية، وبتكون هى الحل الأسلم والأصح للأم والجنين.
علشان كدة كل سيدة على وشك انها تولد قيصري محتاجة تكون مؤهلة للمرحلة دي وتعرف أهم النصائح لقبل وبعد الولادة القيصرية علشان تعدي من المرحلة دي بصحة وسلام.
٩ نصائح للمرأة الحامل قبل الولادة القيصرية
يجب التأكد من بعض القراءات الطبية والوضع العام لصحة المرأة الحامل، من أهم النقط اللى يجب مراجعتها الآتي:
١- أن نسبة الهيموجلوبين في الدم طبيعية وان مفيش انيميا
٢- يجب التأكد أن عوامل النزف والتجلط في الدم ممتازة
٣- إن رسم القلب كويس ومفيش مشاكل
٤- أن وظائف الكلى والكبد سليمة
٥- أن مفيش التهابات في مجرى البول، علشان تركيب القسطرة البولية، وأن لا وجود لالتهابات نسائية
٦- أن الغدة الدرقية سليمة
٧- أن سكر الدم وضغط الدم سليم
٨- يجب تجهيز الثدي من أول الشهر التاسع للرضاعة الطبيعية، بوضع كريمات ترطيب خاصة بحلمة الثدي للمرأة. ودي موجودة في كل الصيدليات
٩- أهم حاجة هو التجهيز النفسي لدور الأمومة القادم حتي لو مش أول طفل
بمعنى إنه مؤكد فترة قبل القيصرية هى فترة مجهدة نفسياً لأي أم، لكن الأم الشاطرة والناصحة هي اللي تغلب فرحتها بالمولود القادم على انتظارها لتعبه وخدمته
الشاطرة هي اللي تحس بالانتصار والإنجاز انها كملت حملها للوصول للولادة اكتر من انها تفكر في تفاصيل تعب الولادة
قراءة مهمة: أفضل برنامج متابعة للحمل لضمان سلامة الأم والجنين
٧ نصائح للمرأة الحامل بعد الولادة القيصرية
١- يجب الانتباه جيداً في حالة خروج دم أو أي سائل أصفر من مكان الجرح بالذهاب فوراً للطبيب حتى لا يكون هناك تلوث للجرح
٢- يجب لمرضى السكر والضغط بالانتظام في أخذ العلاج حتي بعد الولاده
مش تقول خلاص انا ولدت، لان حالات ارتفاع ضغط الدم القوي بعد الولادة مباشرة بتكون أسخف كتير قوي من الي بتحصل اثناء وقبل الولاده.
فارجوكي لو كان ضغطك عالي اخر الحمل اوعى توقفى علاجك إلا بأمر طبيبك المعالج
٣- الإكثار من شرب الماء علشان الرضاعة الطبيعية تمر بسلام
اهتمي بالاكل المفيد لان طفلك امانة بين ايديكي لو قصرتي في اكلك وشربك هينعكس علي اللبن الي بيرضعه
٤- اوعي تأخذي اي ادوية الا بمراجعة طبيب الأطفال
ومتقوليش ما انا ولدت خلاص لان خلي بالك اغلب الأدوية تفرز في لبن الأم، يبقى نتأكد الأول من طبيب الأطفال
٥- بلاش نشيل أوزان تقيلة لحد ست أشهر بعد الولادة حتى لا تتعرضي للفتق
٦- ارجوكي استعملي وسيلة جيدة لمنع الحمل بعد استشارة الطبيب
مش تستعملي وسيلة مع نفسك، لأن اللي يناسب واحدة مش شرط يناسب الثانية، واللي كان يناسبك انتي بعد الولادة اللي فاتت مش شرط ابداً هو اللي يناسبك المرة دي
٧- حبي نفسك وكافئيها بأي حاجة بتحبها علشان تتحملي مشقة تربية طفل وسهرك عليه
لو عرفتي تسعدي نفسك هتسعدي أولادك وزوجك وكل الدنيا حواليكي
لو محتاجة المساعدة الطبية تقدري تشرفينا في العيادة.
أي سيدة بتيجي من الصفحة، الجروب، أو من الموقع هنا بيكون لها خصم خاص في عيادة النساء والتوليد.
د/ سحر عبد العال حامد
استشارية أمراض النساء والتوليد وعلاج العقم
[…] قراءة مهمة: ١٦ نصيحة للمرأة الحامل قبل وبعد الولادة القيصرية […]