دايماً المرأة المرضعة بتكون في حيرة من أمرها، أصوم ولا أفطر؟
أنا خلاص ولدت يبقي أفطر ليه؟
بس أنا بتعب قوي في الصيام وبكون هبطانة ومصدعة طول الوقت!
لا وكمان بحس ان الطفل مش بيبطل عياط ومش بيشبع من اللبن.. طيب اعمل ايه؟
الإجابة تعتمد علي نقطتين:
- أولاً مراجعة الطبيب لك وللطفل
ويستبعد الطبيب أي اسباب قهريه للفطر. يعني مفيش سبب طبي يستلزم إنك لازم تفطري، سواء عندك أو عند طفلك
- ثانياً هو احساسك بنفسك.
يعني لو معندكيش أمراض تستلزم الفطار لكن بتتعبي مع الرضاعة ومش قادرة تصومي
أو انك قادرة تصومي، بس خايفة علي طفلك انه يتاثر بالصيام
في الحالة دي من حقك تفطري، بس بتراجعي دار الافتاء في هل عليك قضاء الأيام اللي فطرتيها فقط أم عليك أيضاً كفارة؛ إطعام ٢ مساكين عن كل يوم فطرتيه
بس في كل الاحتمالات عليك شرب ٣ لتر ماء يوميا.
تقسميهم طول الليل أو لو فطرتي فهتقسميهم علي النهار والليل، ده قرارك.
لكن اللي يهمني ان يدخل جسمك ٣ لتر ماء يوميا لو زودتي خير وبركه لكن مش أقل. لأن إدرار اللبن يستلزم شرب الكثير من الماء.
وكل عام وانتم بخير
في انتظار اسئلتكم في هذا الموضوع او اي موضوع اخر حابين نتكلم فيه
